Dan 13 lulja 2022, di je Galleria d’Arte Moderna Milano, za 31 gošte Republike Kroate oš raporte diplomatike s Italijom, je se tvorila moštra EMANUEL VIDOVIĆ: PASSATISTA E MODERNISTA (1870–1953) / EMANUEL VIDOVIĆ: PASATIST I MODERNIST (1870–1953).

Ovi evend je bija organidzan do Konzulata Republike Kroate iz Milana s Ambašatom. Su bil na ovu večeru ambašator Jasen Mesić, konzul Stjepan Ribić, sindik grada Zagreba Tomislav Tomašević, asesor kulture grada Milana oš familja Vidović. Je se igralo oš je se kandalo s grupem “KUD Tena” iz Đakova (Osijek-Baranja).

Moštra je bila organidzana s „Umjetnički paviljon“ grada Zagreba ter povida, s 50 kuadri, ovi fermi oš kratki kondze ke veže ove dvi zemblje: Italiju oš Kroaciju. Vidović je nika u Split lu 1870 ter se more reč ke je otac modernizma kroati. Kada imaše samo 17 godišta, je poša študijat Venecija di je „Accademia di Belle Arti“, pa lu 1892, za iskat jena teg, je poša živit Milano. Odekaj je ima njegovu prvu espozicijunu.

Di su njegove kuadre se moru vit, s tekniki kako „en-plen air“, „divisionismo“ oš „post-impressionismo“ mista njevoga života: Split, Venecija, Chioggia, Trogir, njegov atelier, crikue oš drugo…

 

Ne skolike znadu ke ovi pitor je činija jena kuadr našoga grada: Mundimitar. Proprija nako, lu 1904, su rival na Kruč iz Splita profesore Josip Smodlaka oš Josip Barač, a s njimi pur pop Herculan Luger oš pitor Emanuel Vidović. Proprija na ovu vizitu, benja, medik Angelo Vetta je da jenu fotografiju Mundimitra Vidoviću. Za ovoga kuadra „Montemitro-1904“ para ke pitor je dopera ovu fotografiju pur si nije drža kunda do tovari oš kundadine ke jesu na prvi pjan fotografije. Ono lipo je ke do kuadra nije se znalo nišče za no lipo malo vrimena. Danas znademo ke zišti, znademo ko je ga činija oš kada, ter se ne nade dobro di je oš ko ga ima. Kokodire iz našoga grada, kano Gabriele Romagnoli, je činija no malo ričerki: do kada je bila guera nije se znalo več di je… Se govore ke je bija prodajen jenomu ljudu iz Šibenika. Fino danas je se znalo daver čuda malo. Smo pital familju Vidović si znadu di je, ma su nam rekl ke nam ne moru činit znat jerke je jena kolecijuna privata. Sperjam ke koji dan čmo moč vit ovi lipi kuadr.

 

Za sada, morete vit nike kuadre Emanuela Vidovića di je Galleria d’Arte Moderna Milano, fino li 21 agušta.